فضلت اكتر من عشر دقايق بتعيط وبتحاول تقنع الشخص اللى بتكلمه انه ما يسبهاش
وصوتها كان عمال يزيد مش غضب لا قهرة ووحع يمكن اول مرة احسهم اوى كدا فى حد
الميكروباص كله كان صامت وصوت عياطها كان هو المستحوذ
فلما خلصت لقيت ست كبيرة بتقولها مالك
يا بنتى فى ايه والسواق وقف على جنب ونزل جبلها مايه وفضلت الست الكبيرة وبنت معاها بيهدوها وهى منهارة عياط
كان المعظم فاهم انها مشكله وفيها طلاق وحاجه تقيله وكله بيتكلم معاها
فدخلت قولتلها حضرتك محتاجه حاجه اى حاجه اقدر اعملهالك
وكل الميكروباص بيحاول يعمل اى حاجه
وفجاة صرخت وقالت جوزى عاوز يطلقنى لانى مريضه بالسرطان
للحظات ماحدش كان عارف يتكلم اصلا ولا يقول حاجه
وهى راحت مكمله وقالت والله هتعالج وهبقى كويسه وانا بحبه انا استحملت مشاكل مع اهلى واربع سنين عذاب من شقه للتانيه وبشتغل وبحاول نبنى بيت سوا وربنا من فترة بدا يكرمنا ليه يسبنى
انا وقفت قدام اهلى وضحيت بحاجات كتير والله انا كويسه وعمرى ما تخيلت انه يتخلى عنى
انا لما عرفت انى تعبانه ماكنتش بقوله علشان اكمل شغل علشان المصاريف ولما زاد التعب وكشفت رحتله شغله اترمى فى حضنه لقيته بيقولى انتى متاكدة طيب اسبقينى على البيت وهخلص واكلمك
وبعدين بيكلمنى يقولى انا هطلقك
طيب ليه يعمل معايا كدة انا اهلى مش هيقفوا جمبى وهو قالى انه هيبقى سندى وظهرى
وفضلت تعيط
وكانت كل اللى فى نفسها تعرفه ليه حصل كدة !!!!!
الست الكبيرة اخدتها ونزلت وقالت هتكلمه وتحاول تصلح ونزلت وركبوا تاكسي سوا
والميكروباص طلع وكله مش عارف يقول حاجه
القهرة والوجع فى كلامها كانوا كافيين انهم يقتلوا جيل مش بنت
ياريت لما تقرروا تبنوا جسر ما بينكم يا تكونوا ادة يا ما تبنوش
الموضوع مش مستاهل وجع اضافى على الوجع الموجود جوانا
احنا اكتر جيل مليان حزن فبلاش نكون حزن زيادة لبعض
فياريت
يا تقدروا تشيلوا بعض يا تبعدوا وتسيبوا العكاز اللى بنتحامى فيه سليم
