تعب الام في تربيه الاولاد وحل مشاكلهم التفهه يوميا

-مراتك نيمت الأولاد..؟ -آه -هايل -بس باصه في السقف ومتنحه، وانا قلقان عليها..!

-لااا ماتخفش -بس من ساعة ما ناموا وهي مافتحتش بقّها بقالها ساعتين، عادي يعني كدا؟ -ايوا يا ابني ماتقلقش، هي بس بتمر بأعراض الفوقان من الصدمه، بيني وبينك اللي شافته طول اليوم مع العيال مش شويه الولاد بتصحي من ٦ الصبح مش بيناموا الا واحده بليل كل دا بتأكل وتشرب وتحمي وتلبس وتقلع وتغسل وتنشر وتحمي تاني.. مراتك حكت حكايه سوبر مان ٣٠ مره عشان ابنك بيحبها، هي هي بنفس التفاصيل وبنفس الانبهار وجريت ورا بنتك الشقه كلها عشان تحلق عليها وتأكلها مسحت الارض ٢٠ مره عشان الي وقع منه عصير واللي دلق مايه واللي ما صدق وأتزحلق بتجاهد كل مره لحد ما تنيم طفل معندوش أدني استعداد للنوم

بتمشي تلم فتافيت الارض فتفوته فتفوته، عشان بنتك بتشفطهم ولا اجدع مكنسه ابنك لما يفتح باب الحمام بتجري تقفله لحسن الأخطبوط الصغير يدخل إيده في البلاعه وممكن راسه كمان، بتدخل دا الحمام وتغير لدي البامبرز وهي بتطبخ عنيها في وسط راسها لحسن حد يتخبط او يكسر حاجه، وعايشه مع خلفيه متواصله من الزن والرغي والطلبات اللي مش بتخلص بتسمع كلمة ماما ٥٠٠ مره وعايز ١٠٠٠ مره والمفروض تمسك اعصابها وتبقي هاديه وبتضحك وبتلاعب وبتدلع

بتحل في نزاعات غلسه واشتبكات رخمه بين طفلين سابوا ٢٠٠ لعبه وحبكت يلعبوا بلعبه واحده في نفس اللحظه، كل واحد لو يطول يجيب التاني من زوره هيجيبه بتقنع بنتك ان المناديل مش بتتاكل وبتطلع الورق من بقّها بأعجوبه بتعقم ببرونات، وتعمل لكل واحد اكله، وتضحك معاهم وتلعب وتعمل حصان وتقلد صوت البطه وغيره كتير، ولسه كل ما يكبروا تكبر أحتياجتهم.. عرفت هي ساكته ومتنحه ليه؟ شابوو للأمهات 👏 اللي بيعملوا أراجوزات وبيطبخوا ويأكلوا ويلاعبوا ويحموا ويذاكروا ويدلعوا وكل حاجه..